ലോകത്തെ ഏറ്റവും ധനാഢ്യരായ വ്യക്തികളെയും സ്വാധീനശക്തിയുള്ള വ്യക്തികളെയും തിരഞ്ഞെടുക്കുമ്പോള്, അതിലുള്പ്പെടുന്ന ഇന്ത്യക്കാര് നമ്മുടെ മാധ്യമങ്ങള്ക്ക് ചൂടുള്ള വാര്ത്തയാണ്. എന്നാല് രശ്മി സിന്ഹ ഈ പട്ടികകളിലൊന്നും ഇടം തേടാതെയാണ് ചൂടന് വാര്ത്തയിലിടം പിടിച്ചത്. അമേരിക്കയിലെ സെക്സിയസ്റ്റ് സ്ഥാപന മേധാവികളെ തിരഞ്ഞെടുത്തപ്പോഴാണ് അതില് രശ്മി സ്ഥാനം പിടിച്ചത്. സ്ത്രീകളുടെ സൗന്ദര്യം വിഷയമാക്കിയ ഈ തിരഞ്ഞെടുപ്പ് നടത്തിയതാകട്ടെ, ലോകത്തെ ഏറ്റവും പ്രശസ്തമായ അഡല്റ്റ് മാസിക പ്ലേബോയിയും.
സ്ലൈഡ്ഷെയര് എന്ന വെബ്ഡിസൈനര് വെബ്സൈറ്റിന്റെ സി.ഇ.ഒയാണ് രശ്മി. സ്ഥാപനമേധാവികളുടെ സൗന്ദര്യവും ബിസിനസ് രംഗത്തെ പ്രാവീണ്യവുമാണ് പ്ലേബോയ് തിരഞ്ഞെടുപ്പിന് ആധാരമാക്കിയത്. അടിവസ്ത്ര വില്പന ശൃംഖലയായ ജേര്ണെലിന്റെ ക്ലയര് ചേംബേഴ്സ്, ഫിറ്റ്നസ് സ്ഥാപനമായ ഫഌറ്റി ഗേള് ഫിറ്റ്നസിന്റെ കെറി നീ, ലൈഫ് വേ ഫുഡ്സിന്റെ ജൂലി സ്മോള്യാന്സ്കി, ഗ്രാസ്പര് വീഡിയോ സൈറ്റിന്റെ തെരേസ ഫിലിപ്സ്, വൈന് ഷോപ്പിങ് സ്ഥാപനമായ ബോട്ടില്നോട്സിന്റെ അലീസ റാപ്, അഡല്റ്റ് സിനിമാ കമ്പനിയായ ഫെം പ്രൊഡക്ഷന്സിന്റെ കാന്ഡിഡ റോയല്, ഡിജിറ്റല് മാര്ക്കറ്റിങ് സ്ഥാപനമായ കണ്സര്ട്ട് മീഡിയയുടെ അലീഷ് മോര്ഗ, വിക്ടോറിയ സീക്രട്ട് ചെയിനിന്റെ ഷാരണ് ടേണി, ബുസ് മാര്ക്കറ്റിങ് ഗ്രൂപ്പിന്റെ ടിന വെല്സ് എന്നിവരാണ് രശ്മിയ്ക്കൊപ്പം പ്ലേബോയിയുടെ പട്ടികയില് ഇടം നേടിയത്. ഈ പട്ടികയില് ഏഴാം സ്ഥാനത്താണ് രശ്മി.
വെബ് ഷയറിങ് രംഗത്തേയ്ക്ക് യാദൃച്ഛികമായാണ് രശ്മിയുടെ വരവ്. ഉത്തര്പ്രദേശിലെ അലഹബാദുകാരിയായ രശ്മി ബ്രൗണ് സര്വകലാശാലയില്നിന്ന് ന്യൂറോസയന്സില് പി.എച്ച്ഡി ബിരുദധാരിയാണ്. 1998ല് പി.എച്ച്ഡി പഠനത്തിനായി അമേരിക്കയിലെത്തിയ അവര് പിന്നീട് അവിടെത്തന്നെ തുടര്ന്നു. അമേരിക്കയിലെ സുന്ദരികളായ പത്ത് സ്ഥാപനമേധാവികളിലൊലാരായി തിരഞ്ഞെടുത്തിരിക്കുന്നുവെന്ന സന്ദേശം ലഭിച്ചപ്പോള് ആദ്യം അതുള്ക്കൊള്ളാനായില്ലെന്ന് രശ്മി പറയുന്നു. ഒന്നാമത്തെ കാര്യം അത് ലഭിച്ചത് പ്ലേബോയിയില്നിന്നാണെന്നതു തന്നെ. സൗന്ദര്യംകൊണ്ടല്ല തന്റെ കരിയര് താന് രൂപപ്പെടുത്തിയതെന്ന് രശ്മിയൊട്ട് വിശ്വസിക്കുന്നുമില്ല. പി.എച്ച്ഡി പൂര്ത്തിയാക്കിയശേഷമാണ് വെബ് ലോകം രശ്മിയെ കീഴടക്കിയത്. മനുഷ്യരും കമ്പ്യൂട്ടറുകളുമായുള്ള ഇടപഴകല് മനസ്സിലാക്കലായി അടുത്ത ശ്രമം. ഈ വിഷയത്തില് കാലിഫോര്ണിയ സര്വകലാശാലയില് ഗവേഷണം ആരംഭിച്ച് രശ്മി ആദ്യം ഉസാന്റോ എന്ന പേരില് കണ്സള്ട്ടിങ് സ്ഥാപനം ആരംഭിച്ചു. കസ്റ്റമര് റിസര്ച്ചിന് സഹായിക്കുന്ന മൈന്ഡ്കാന്വാസ് എന്ന സോഫ്റ്റ്വേറാണ് രശ്മിയെ ഈ രംഗത്ത് പ്രശസ്തയാക്കിയത്. ഭര്ത്താവ് ജോണ് പട്ടേലുമായി ചേര്ന്ന് 2007ലാണ് സ്ലൈഡ്ഷെയര് എന്ന വെബ്സൈറ്റ് ആരംഭിച്ചത്.
യാദൃശ്ചികമായാണ് താന് ബിസിനസ് രംഗത്തെത്തിയതെന്ന് രശ്മി പറയുന്നു. പത്രപ്രവര്ത്തകയാകുകയായിരുന്നു ആദ്യ ലക്ഷ്യം. പിന്നീട് ലബോറട്ടറി റിസര്ച്ചിലായി ശ്രദ്ധ. ഒടുവില് വെബ് ലോകത്തേയ്ക്ക് ആകര്ഷിക്കപ്പെടുകയായിരുന്നു അവര്. ഇന്ന് സ്ലൈഡ്ഷെയര് ലോകത്തെ ഏറ്റവും പ്രശസ്തമായ വെബ്ഷെയറിങ് സൈറ്റുകളിലൊന്നാണ്. ഇന്റര്നെറ്റ് ബിസിനസ് രംഗത്തെ വഴികാട്ടികളിലൊരാളായാണ് ഇ-ലോകം രശ്മിയെ കാണുന്നത്. ലോകമെമ്പാടും സെമിനാറുകളിലും മറ്റും അവര് ക്ലാസ്സുകളെടുക്കുന്നു. സാന് ഫ്രാന്സിസ്കോയ്ക്ക് പുറമെ ന്യൂഡല്ഹിയിലും രശ്മിയുടെ ഓഫീസ് പ്രവര്ത്തിക്കുന്നു.
